السبت:
عندنا وردية إضافية، 10 ساعات بعد الظهر، يا رب يكون فيها أوفر تايم كويس.
روحنا بعد الوردية في نص الليل، اتكسفنا نسأل المشرف على الأوفر تايم، بس هو ضروري هنقبضه مع المرتب.
الأحد:
المشرف هنانا على نشاطنا وبشرنا بإن صاحب المصنع مقدر مجهوداتنا الكبيرة للمحافظة على مستوى الإنتاج وتحقيق النتايج المطلوبة، وصرف لنا.........
10 ساعات عمل إضافية تاني...........إهئ
الإثنين:
الظاهر إن موضوع ساعات العمل الإضافية ده هيستمر شوية علشان مطلوب مننا طلبيات إضافية كتير، بيقولوا إن مصنعنا هيبقى مصنع عالمي، وسمعتنا جابت بلاد بره ما شاء الله، عموما نجاح المصنع نجاح لنا كلنا، وضروري هيفتكرونا في الأوفر تايم.
أول الشهر:
رحت النهارده أقبض المرتب وأنا في انتظار الحوافز العالية على الطحنة الممتازة اللي اطحناها الشهر اللي فات، لقيت أمين الخزنة مديني المرتب مخصوم منه 50%، سألته هو فيه إيه يا باشا؟ قاللي الطلبيات الكبيرة اللي اشتغلناها لسه ما قبضناش تمنها، وعندنا أزمة سيولة، إن شاء الله الشهر الجاي تكون الأزمة اتحلت، وتقبض المرتب كامل إن شاء الله، واهو كله عشان خاطر المصنع اللي بناكل منه عيش.
الشهر اللي بعده:
اتكرر نفس اللي حصل الشهر اللي فات، بس الشهادة لله، المرة دي قبضونا المرتب ناقص 25% بس، واهو كله عشان خاطر المصنع.
الشهر اللي بعده:
أصبح منتهى أملنا نقبض المرتب كامل ومش مهم الأوفر تايم.
الشهر اللي بعده:
الحمد لله الشهر ده الخبراء الأجانب زارونا، وأبدوا إعجابهم بمستوانا ومستوى إنتاجنا، وأنا مــتأكد إنهم دفعوا مبلغ محترم لصاحب المصنع، رئيس الحسابات أكد لي، أصله هو اللي ودى الشيك البنك، وما فضيوش يدونا المرتب.
تاني يوم:
ألف مبروك ياجماعة، بشرنا السيد أمين الخزنة إن المرتب كامل الشهر ده، قلنا بشرى خير، إيدك بقه على الأوفر تايم، قالنا: الله مين قال فيه أوفر تايم خالصٍ، سياسة المصنع لا تسمح يا جماعة، ولا اللائحة الإدارية، الأوفر تايم من حق مدير المصنع، والنائب بتاعه ابن خالته، ومدير التصنيع ابن عمته، ومدير المشتريات ابن اخوه، وأمين الخزنة طبعاً، والجملة الأخيرة كانت من عندى أنا طبعاً.
تالت يوم:
قالوا لنا عندنا وردية إضافية يا جماعة، روحنا كلنا طبعاً.
رابع يوم:
طلع علينا النهارده مدير المصنع يهدد ويتوعد، ويقولنا بقى بعد ما خليتكم مصنع عالمي تعملوا معايا كده، قلناله إحنا معتصمين لحد ما ناخد حوافز زي المديرين وأمين الخزنة، ووعدنا يفكر في الموضوع.
خامس يوم:
لا زلنا معتصمين........
سادس يوم:
معتصمين.........
سابع يوم:
وقفت مع الزملاء ونحن نهتف في صوت واحد: الله يخرب بيت صاحب المصنع.
ثامن يوم:
أخيراً استجاب صاحب المصنع لطلباتنا وصرف لكل عامل 2 جنيه حوافز.
تاسع يوم:
النهارده استقلت وانا ضميري مرتاح بعد ما أخدت الحوافز.
اليوم العاشر:
غيرت شغلي ووقفت على باب المصنع أشحت، الحقيقة دخلي دلوقت قد المرتب والحوافز 10 مرات، بس اوعوا حد يقول للزملاء، أحسن ما نلاقيش حد يشحتنا بعد كده.

موضوع رائع بوركت

موضوع رائع بوركت

موضوع رائع بوركت