الآقسام الترفيقية

**gogo** · 2011-04-17, 18:28

ذات مساء وبالتحديد على طاولة الطعام كانت العائلة مجتمعه كحبات اللؤلؤ المنتظم على عقد بديع تلبسه تلك التكرونيه جميلة الملامح..
وبينما كانت اصواتهم تتعالى كبزران المرحلة الابتدائي وتو المُدرّس طالع من عندهم! إذا بالام تدخل عليهم وهي حاملة بيدها صحن مدفوس بالجح الشهي, نظرت اليه ووقعت عيني على تلك الشلخة الحمرا المغرية للبلع وما ان مددت يدي لألتقطها حتى اقطوطرت سعبولتي ولم احس بنفسي إلا وانا ارتشقها بكل لهفة متلذذة بطعمها الشقي!
وبينما انا مستمتعه بها وحلاها يداعب لهاتي احسست بشيء يدغدغني ويتسرب نحو مرفقي رويدا رويدا احسست بالرطوبة تسري داخل جسمي.. ياااه ما اجمل الجح في موسم الشتاء خاصة اذا كانت الجحة مربربة!؟

على نفس تلك الطاولة عقدت العائلة اجتماعا ولكنه مغلقا لكي تناقش فيه مصير اسبوع الاجازة واين سيتم قضاؤه , وبعد كثرة المناوشات والمشاورات ولا تهون المناقشات قررت العائلة ان يكون الاستجمام في أحد الدول المجاورة وبالفعل وقع الاختيار على دولة الشرقية وذلك لكثرة ميزاتها والتي لم نكن نعرفها قبل احداث ثورة البحرين!

الكل متحمس لتلك الرحله والكل متشوق للشرقية ورطوبتها التي تداعب جفاف بشراتنا!! وبعد تجهيز العفش وتحميلة على تندة تلك السيارة الفارهه (أخاف اقول انها جمس ازرق موديل 85 يدري عنها مربوش ويعاف الكوريلا حقته )
واخيرا مسكنا خط الشرقية هاربين من زحمة الرياض متجهين نحو زحمة الشرقية وعلى قولتهم حشرن مع الناس عيد, حتى السيارة كانت زحمة رغم سعتها وقلّ عدد الاشخاص فيها!! وشلون ماتصير زحمة والبيالات والفناجيل متبربخه في اغلب المقاعد؟ ومسوية سطو على المكان وكل ماحركت رجلي صرخ الفنجال بوجهي عدلي جلستك
وان فتحت الشباك ابي هوا قرصتني البيالة تقول سكري الشباك ذبحنا الهوا
طول الطريق وانا ماكله تبن بينهم ,,
اخيرا انتهت مأساة الطريق ووصلنا بسلام لمقر سكننا المعتاد, اوقف اخي السيار وانتثرنا منها كاللؤلؤ المنثور من العقد اللي ماعطته تكرونية ثانية من رقبة التكرونيه خويتنا اللي قبل شوي
بعد الوصول والراحة تم الاستعداد للذهاب للبحر! طبعا وش الاستعدادات؟ مايوه, عصير فرش, نظارة شمسية, مرجيحه ام نفرين, كريم وازلين للي يبي يسوي تان وغيرها من الاستعدادات

أخيراً وصلنا البحر وكالعادة يخلّص يومنا نبحث فيه عن مكان نظيف, والموية ميب غويطه, وعوائل بدون شباب, ولازم هادي ومافيه بزران واجد, ومافيه بسّاطات يبيعون كوَر ولا ذره ولا بليلة ايه صح ولازم مايصير فيه شمس(ابي افهم رايحين للبحر ليه؟ نصور معه والا نتقهوى معه الشاهي على كل هالتشرط؟)
واخيرا لقينا مكان جدا جدا مناسب! على يميننا سوارية معهم درزنين بزران ويسارنا خوال معهم مرواس وطار وسماعات ستريو
فرشنا فرشتنا الخضرا المنقطه بأبيض واسود وفيها في الوسط سيفين ونخله بس والله ميب جايتنا هدية من الحكومة انا شايفه اخوي بعيني اللي بياكلها الدود شاريها من سوق الزل قبل 15 سنة طبعا ماطلعناها من فوق الملحق الا قبل مانجي بيومين حشى من هالوصف حسيت لو حنا جالسين على تراب عقب هنود ان اصرف من ذا الفرشه
المهم وحطينا سلة القهوة عاد كلش الا سلة القهوة لحد يقول فيها شي, ترمس القهوة نصه منكب على السلة والبيالات والفناجيل حاشرينهم ببلاستيكه بس بدون الهيئة يعني يتصافقون محد يقول لهم أ كنهم اخويانا ال .... والا منيب قايله اخاف يطيرون بي فأبو زعبل عاد وقتها منتب نافعيني
طبعا مامعنا شاهي بس لازم البيالات عضو شرف بالعزبة وبلاستيكه ثانية للتمر يمين خلاص مكنوز ويسار سكري ماكنز وكم حبة روثان جايه بالغلط
وبلاستيكة ثالثة فيها بقايا باتشي على معمول الصالحية وعود توكس كان فوق الميكرويف وحطوه تكريم للنعمة
حشى على هالبلاستيكات حسيتني داخله دعسوق من دعاسيق العويس ياحليلها عزبة القهوة هي وهالمكونات مسوية جو اسري هي ووجهها
المهم بعد ماحطينا العزبة على الفرشة اللي تو هههههههههههههه ياربي كل ماتذكرت الفرشة غشيت ضحك والله لو تدري عني اني احش فيها كان تفلت بوجهي وقالت هذا جزاي ظافتكم عن تراب البحر ماتدري ان التراب مغطي نصها بس حنا معطينها جوها من اليوم واسم انها فرشة مرزوزه بشنطة السيارة الله يغفر لي قطّعت جلدها وحشيت فيها لين قالت ربي الله
الوكاد اني قررت اتجول على شاطيء البحر,, فوق رماله الصالخة وتحت سماءه الصافية << اخيرا قدرت اعدي ازمة اشعة الشمس الذهبية <<حسيتني العب كراش وابي اعدي الوحش عشان ارقى الدور الثاني بس الحقير ناشب لي ماطاع يموت
وبينما كنت اتجول واشوت التراب برجلي عشان يطير فوق وبعدين اهفه بأثمي لين يسبقني مترين قدامي وهكذا!
وانا امشي وفي احد الهفات اللي هفيتها رفعت عيني شوي واذا بي المح ذلك القارب وكان عليه لافته (الشخص بعشرتريل) وبعد ماشفته ذهبت مهرولة لاخي وقلت له فلان فلان فيه قارب خن نروح نركبه!
وكعادتة الكريمة لم يرفض لي طلباً قط (اخوي تهجين اتراك والا لو انه سعودي كان صكني كف وقال ماعندنا بنات يركبون لنشات ) هههههههههههه اتخيل شكله يقول لا وانا طايحه فيه هواش وبالأخير اقول له برجع للرياض مشي
لبى قلبه ماعمره قال لي لا ! الا اللهم مره وحده قلت له تسمح لي اروح اجغف ذاك الاطخم بسرعة واجي قام مسح على راسي وقبص خدي وقال لا! اما غير كذا الشهادة لله انه حبيبن رحيب
الله يقطع شيطانكم دايم تحبون تقطعون سالفتي
لمهم اتجهنا نحو ذلك القارب الصغير ابد مثل قطيع الخرفان اللي ماصدقت على الله يفكون باب الشبك عنها عشان تسرح وتمرح اللي تبي تزور جارتها واللي تبي تواعد خوياتها وحتى فيهم الداشرة اللي مواعدتن خويها عند وايت الموية اللي يسقون منه الغنم ,, موب سهلين ذا الخرفان حتى هم يحبون الهجولة
وبعد ماقربنا من عند القارب لمحت لي كائن قمحي البشرة, وسيم الوجه, جذاب الشكل, مفتول العضلات, كثير الرومنسية ولا اخفيكم توقعته ملك منزل من السماء وان هذا زوله!وشوي الا لمحته مرتن ثانية قمت قلت في نفسي سبحان الذي سخر لنا هذا وماكنا له مقرنين
المهم وشوي الا والمحه مره ثالثة قمت فركت عيني وقلت اكيد داخلها غبار, قمت نغزت اخوي وقلت له انفخ بعيني فيها شعرة مدري تراب ناشبن فيها عاد اخوي الله يجزاه خير موب بس نفخ الا تفل وطلع لي قطع مع تفلته لين بغى يغمى علي عاد تفلت اخوي مباركه وصرت اشوف بالعين اللي تفل فيها اقوى من العين الثانية لدرجة صرت امشي وانا اعرج
وبعد ما تأكدت ان اللي شفته كائن حقيقي ومتواجد على ارض الواقع طارت بوهتي فيه ومن كثر ما ان بوهتي طايره سوت زي الغمامه على عيني << انتي يا البوهه وبسببها تعثرت بسمكة كانت طالعة من البحر تركض ويدها على اثمها وتقول طلقني! يعني زودن على هم ذا السمكة جيت انا وكملت الناقص عليها وتعثرت فيها! يالله عسى ماجاها تكفير لذنوبها وان شاء الله انها على اجر
وين وصلنا؟؟ ايه يوم طحت
هو شافني وانا اطيح وابتسم بوجهي ابتسامه حمرا << أجل تبونها صفرا وخشته زوهرية؟؟
احمرّت خدودي من الفشيلة وعيوني زغللت وبدت علي النفضة كني جوال على الهزاز او خاله طقها الزار, وسعبولتي ماتحملت الموقف وقوطرت لين وصلت للارض والنذلة مدت رجلها قدامي لين زلقت فيها وتكرفست على وجهي
تلاحقت الموقف واستجمعت قواي ووقفت على حيلي بعد ما لملمت عبايتي ونفضتها من التراب وحركت شعري بطريقه انسيابيه تدل للرائي اني ترى ماطاح وجهي بديت امشي خطوه خطوه<<هدا هدا مشى وعدا وانا اسوي نفسي اعرج عشان يقول عني البنت النعومآآآ والدلوعآآ اللي ماتحملت الطيحة وبنفس الوقت احاول اخفي منسوب الفشيله اللي حصل لي قبل شوي
المهم وانا امشي واحس بالناس حولي يناظروني ويتناغزون بينهم ويعلقون على شكلي يوم طحت! وانا عيوني قدام والعبرة والضحكة ثنائي ماحلاهم ربي اذا اجتمعوا بنفس الوقت, ودك تمسك كل وحده وتلزخها مع مقفاها والا اقلها تصبخ روسهم ببعض يعني لاهيب عبرة وطلعتها وارتحت, ولاهيب ضحكة اقول بها بسرعه وامشّي حالي فيها,, ثنتين بنات كلب اجتمعوا ووهقوني معهم ومابي اضيع وقتي لهم لا بارك الله فيهم
المهم كملت مسيرتي متجهةً نحو اهلي وابتسامة ذاك اللي شفته ماخذه شنق من مخيلتي وحسيت بشي غريب مدري وشو؟ احساس اول مره احس فيه من 50 سنة !!
احساس خلاني اقول ياليتها راحت علي نومه ولا طلعت معهم للبحر
ياليت اهلي نسوني مع عزبة الشاهي بالرياض
ياليتني طرت بدال المركا اللي فوق التنده
ياليت ابوي ترك امي تكمل نشر الغسيل ذيك الليلة ولا حملت فيني!
الاحساس هذا بيخليني اعود لرشدي وانوثتي وهذا اللي انا خايفه منه ولا حسبت حسابه! الكائن اللي شفته لو حصل لأي شخص عاقل بالغ انثى وشافته اكيد بتختار احد هالخيارات :
1- تعتزل الفن
2- تقدم اوراقها على مستشفى شهار
3- تنتحر
4- جميع ماسبق
مافيها كلام الاجابة الصحيحة هي الأخيرة
أول مره بحياتي اتحمس واشتري كتاب كيف تكوني انثى مكتمله للكاتب الروائي الاول والصحفي في النيو تايمز والمذيع الاخباري بقناة الجزيرة والعالم الفيوسولوجي في تكوينات وجينات المرأة الاسطورية في المهارات الرومنسية << جيت بقول جنسية بس خفت يلحطوني
تدرون وماحلفتوني توني اعرف ان فيه شي اسمه ودتسه لتنعيم البشرة ! موب قهر عمري اللي راح؟؟
الامر هذا خلاني اتهور وافتح على قوقل لأبحث عن خلطة لتغميق الركب! وانا صادقة مابيه يقول وش هالبرصا اللي ركبها افتح من جسمها يااااه كم هي الانوثة شي جميل لا يعرف قدرها غير فاقدها!!
في نفس صفحة قوقل بعد ماسويت تراجع من صفحة خلطة الركب رحت وبحثت عن معجم لسان العرب ابي اتأكد من المعنى العلمي الصحيح للي شفته وبعد البحث والتحري لقيت ان اللي شفته يسمونه علماء الفيزياء بالاطخم تدرون يوم بحثت وش طلع لي؟ طلع لي هالمعنى
أ اجمل واحد, ط طويل ويجنن, خ خميه ولاعليك من احد , م ماجاك علي
خلوني اشوف احد ناط بحلقي والله لأصبخه بذا الكتاب اللي معي واللي عنده اعتراض يروح لابن منظور هو اللي قايل هالكلام موب انا
طبعا بعد كل هالتغيرات الفيسولوجية الحاصلة لأنوثتي والاحاسيس المنبثعة والمنبثقة قمت بتغيير جميع خطط الاستجمام وخطط تغيير الجو وبديت اركز بأمور اهم وارقى من هالجو اللي كل يوم والثاني لاعب علينا وصاير شكل! الوكاد ومن غير مقدمات قررت الانتقال والعيش في المنطقة الشرقية تاركةً خلفي اهلي وخلّاني << طيب واللي يحب عمامه اكثر؟
>> ماصلة ماتضحك
<< انقلعي محد قال اضحكي
^^^
الله يشفيكم ياكثر ماتتهاوشون
<< حتى انتي الله يشفيك
هههههههههههههههههههه خلاص خلاص لحد يعصب والله ماعيدها
وبعد برهه من الزمن تم الانتقال لتلك الدولة وقدمت على وظيفه مرموقة تليق بمقام حضرتي وتناسب جلالة قدري وتتوافق مع برستيجي
وبالفعل ما امداني اقدم على الوظيفة الا وحظيت بالقبول الفوري وبديت اباشر وظيفتي كمنظمة مراجيح عند نفس ذلك الشاطيء
طبعا كأول يوم دوام لازم اكشخ لان اول انطباع بياخذونه عني هو في ذا اليوم.. قمت لبست دراعتي الكاروهات ونقضت شعري كله! صحيح انه شوشه كنه شجرة عوشق بس ماعليه هذي ظريبة الكشخة
وطقيت لهم ذيك الديرمة البرتقالية اللي تقول لاشعة الشمس قومي واجلس مكانك وشلت شنطتي اللي تطق لسلة سندريلا اصبع وركبت سيكلي البي ام وانطلقت على بركة الله لمقر عملي ,,

طبعا مع مرور الوقت حبيت عملي بل عشقته وصرت امطخه كل صبح وابدع واتفنن فيه.. حتى من زود النصح صرت اجلس ساعات لبعد الدوام حتى انهم قالوا لازم نعطيها بدل نظر ولازم نسوي لها ليزك بسبب الجهد المتمركز على عيونها الذي كان السبب الاول وليس الاخير لإنحرافها عن المسار الصحيح مما ادى الى اصابتها بالداء العضال المسمى بالحول !!
وفي مره من المرات كنت لاهيه اضبط ديرمتي استعدادا للتمقل في حبيب القلب وبينما كنت في اشد حالات التحمس بالتديرم الا طاح مني شي ومع الربكة نزلت بشوف وش طاح , وانا جالسة اتلمس الرمل الا فجأة اشوف رجول واحد اطخم قدامي!
بتقولون كيف عرفتي انه اطخم من رجوله؟ بقولكم سبحان الله رجول الطخمان تجي مرتبه واصابعه مصفوفه صف جنب بعض كنها ضروس طلي فاق اثمة وصاف طابور يحتري واحد يجي يعاينه ليلة عيد الاضحى
على طاري كلمة ضروس اذكر جتني وحده بالفورم وجالسة تنخبق ولا فهمت من نخابيقها الا النقطة اللي بآخر كلامها وقلت لها روحي ركبي طقم ضروسك وتعالي تكلمي عشان افهم عليك ,, جتني عقب قالت انتي وسخه وقذرة وماتربيتي وبنت شوارع قلت لها ليه؟ قالت ليه تقولين ضروس اسمها اسنان
قلت لا حنا نسميها ضروس ومانقول اسنان الا لين بغينا نروح للدكتور نقلعها لان معروف السن يقلع والضرس يحشى يعني مثلا اقول اقلع سني اليمين واحش ضرسي اليسار! فرق بين الضرس والسن بس وشولن تقنعها؟ اصلا هي قروية وش يعرفها؟
وووه مسكت خط ونسيت سالفتي الصدقية, ذكروني وش كنا نقول ؟ ايه صح وقفنا عند رجول الطخمان الله يكرمني والسامعين وان لونها واحد موب جامعة جميع الوان الطيف
حتى سبحان الله يقولون ان بيكاسو يوم جا بيسوي دمج بين الالوان عشان يخترع الوان جديده جا عندنا بالسعودية ومسك رجل واحد كان كاشت بالثمامة وتوه نازل من دباب ومنجرحة رجلة وقام يطلّع في الالوان ومن غير مايتعب نفسه بالدمج..
حتى يقولون من كثر الالوان اللي صادفته قام طلعها كلها وحطها بالتجوري حقة عشان احفاده اذا جو من بعده يطلعونهم ويقولون هه شوفوا جبنا لكم الوان اجدد من حقت ابونا ,, سبحان الله رجول السعوديين كنوز مهدره وحنا مادرينا عنها..
المهم يوم شفت رجولة جلست اواسي شعري لا يكون فيه شعره ناتقه منّا والا مناك عاد خبركم الشعر تطلع مواهبة عند رطوبة البحر والا انا هين شعري مهنا انعم منه بسم الله علي الف اسمن حصين اذكروا الله لا يحت شعري
طبعا انا ارتبكت من الفشيلة عاد هو حس فيني وطنبس عندي ومسك يدي وقبّلها على جبينها قبلة الصباح المشرقي وفتحها وحط فيها ديرمتي وسكّر عليها وقال لي نملة! قلت لبيه
رجع قال نملة ,, رديت عليه وانا كلي خجل قلت له سمّ
قال نملة , قلت له وانا معصبة : وجع!!
رد علي : وجع يوجعك انقلعي مناك

اثره اخوي يمد لي نظارتي طاحت مني وكنت احسبها ديرمتي << قلنا حولا بس ماتوصل لشلل نصفي

قصاصة الموضوع
زيرو نبر ون / البسوا نظاراتكم زين عشان تشوفون الدنيا واضحة حتى اللي مسوي ليزك لازم يلبس نظارة عادي حتى لو اطار بدون عدسة بس تكفون الا رايبان
زيرو نبر تو / فعلا ًفعلا ًاذا قالوا لك ان الشاب السعودي لمبة نجفة مكسّره << كاسرتها كورة تكروني ماغسل رجوله من شهرين وزود على كذا مدودلها ببالوعة الحارة عشان يطقها البراد

شين مجمّل ولا زين مهمّل Admin37019613

قسم بالله ان جلسة البحر تخليك كأنك شارب سطل وسكي وخيشة حشيش ورزمتين قات
والنتيجه موضوعي المتهالك

الموضوع الأصلي : شين مجمّل ولا زين مهمّل // المصدر : منتديات أحلى حكاية // الكاتب: gogo

**YouCef-RoCek** · 2011-04-18, 17:08

شين مجمّل ولا زين مهمّل

مشششششششكور يعطيك العافية

الموضوع الأصلي : شين مجمّل ولا زين مهمّل // المصدر : منتديات أحلى حكاية // الكاتب: YouCef-RoCek

**Mr.P R ! N C E** · 2011-04-18, 17:13

شين مجمّل ولا زين مهمّل

مشكوووووووووووووووووور

الموضوع الأصلي : شين مجمّل ولا زين مهمّل // المصدر : منتديات أحلى حكاية // الكاتب: Mr.P R ! N C E

**zakaria2010toiss** · 2011-05-05, 17:22

شين مجمّل ولا زين مهمّل

شكرا لكـ

الموضوع الأصلي : شين مجمّل ولا زين مهمّل // المصدر : منتديات أحلى حكاية // الكاتب: zakaria2010toiss

**Mohamad Yasser** · 2011-05-05, 17:24

شين مجمّل ولا زين مهمّل

شكرا لكـ

الموضوع الأصلي : شين مجمّل ولا زين مهمّل // المصدر : منتديات أحلى حكاية // الكاتب: Mohamad Yasser

الآقسام الترفيقية

قسم المنتديات العامة

المنتدى العام